الأربعاء، 16 أكتوبر 2013

ملاذ أخير

القلب الأبيض مش قلبي
وسكوتي سال على الخرابيش
غطى على ملامحي
مستعجلين ع الإنتهاء
قال يعني ضامنين النجاة
يا ناس يا تايهة في الدروب
سيبوني أضِل عشان أعرف في يوم أتوب
إبني إللي عايش وسطكم
سيبوه يتوه
يمكن يلقى الطريق
إللي يحترم الجنون

الاثنين، 7 أكتوبر 2013

حدوتــــــة

عن فتفوتة إنسان
جسمه بيطرد قلبه ,, إللي بيخبط بعشوائية .. بذعر .. بغباء
من مكوك بطن الأم جاب الآه
جِري في الطل في عز الحر .. في عز البرد
وإتمرغ على تل النجيلة
ساب اللون الأخضر على بنطلون العيد
وكان يخبي ضوضاء جنونه بصوت هتاف
إنهار عليه قمة جبل .. ونام ليلتين في حضن الموت
لكن إنتفاضة آخر نقطة دم حية أزعجت السكون
 رموها وسط موج مسافر جوة دواير
بترحل ولنقطة البداية تعود
لف القلب الذبيح بلاد مستخبي جوة جسد ياقوت بهيج
شاوروا عليه الناس لما طرف جرحه بان
زاد العناد
والغضب فدادين
إتحداهم الولد الهزيل راجل لألف
ليهزم كل كف
 ويهزم كل ضعف
قتل شهوته والخوف
قتل الدموع والجوع
باقي الحنين للبيت
باقي الحنين للحضن
باقي الحنين للأب
باقي هلوسة الوداع
باقي الحنان جوة العيون مفيش كذبة قادرة تلونه
باقي عطر الليالي وحضن ستي
والشال القديم فوق النجوم
بيخلي بكرة ورايا
باقي الأمل .. طفل هارب من جنود الإحتلال
في حطام بيوت
خايف لتسرقه







الأربعاء، 28 ديسمبر 2011

الاكتئــــاب صديقي ..

انا اللي مقدرش اعيش من غير زهق .. وانا اللي بحس ان ضوء الشمس بيهرب من شباك أوضتي في الشتا وانا محتاجاه .. ومبيفارقنيش في الصيف وكأنه معاند عرقي ,وانا اللي اقتنعت كفراً ان الأقدار بتتوزع على الناس بالتساوي وتخاصمني انا .. ثم استغفرت .. و آمنت تاني ,وبالوراثة زي كل مصري صميم لو ضحكت شوية زيادة من قلبي اقول خير اللهم اجعله خير , اقفل باب أوضتي عليا واستنى الدمعتين ,واركز قوووووي في اي حاجة توقف نزيف الفرحة ده.. ذكرى أليمة,خوف من مستقبل,لوم للنفس ,معرفش ليه ده كله بيحصل توماتيكي توماتيكي وبتلقائية شديدة ألاقي نفسي رجعت فعلا وبسرعه للجو النفسي المعتاد والرتم الطبيعي للقلب الموجوع,يمكن لأن السمك ميقدرش يعيش برا المية ,وبحكم التعود قلبي بقى مصاحب الاكتئاب ...
وحبيت بجد الانزواء في مكان غير مرئي للجميع ,سطوح بيتنا,وليالي على مكتبي الحنون مع اجندة قديمة وقلم بيجري فوق الورق مش ملاحق على فيض الكلام ,والكلام جوة راسي بيعمل زحام,واقول هكتب واكتب يمكن يخفف م الصداع ,وأسفاً كل ما اكتب تتكاثر وتتفرع وتنبت من كل سطر حكايات,ويدق قلبي بصوت جليل,خايف كلمة تضيع وسط الزحام,وتغرق تحت موجة نسيان ..
كل كلمة بنت قلبي,نبتت من احساس كان مهم ليا يوماً ما,هي ثمرة مرحلة ,درس أو جرح أو نيشان ,لازم يعيش ,وارجعله يوم احضنه وافتكر بيه يوم من حياتي,هو سلمة في عقلي لو انهارت يختل ترتيب الأشياء .. ويصيبني التلعثم ..

الأحد، 25 ديسمبر 2011

كلام متبعتر ..

وشربنا كلنا من نفس النبع .. شربنا قد ما نقدر واكتر .. احتياطي .. يمكن نعطش بعد خطوتين , واتفرقنا .. واكتشفت اني يمكن اكون اقلهم احتياجاً .. او استحقاقاً .. أصلها تفرق ..مش محتاجة ولا مستحقش .. لكنه نفس الندم والعتاب الداخلي عند الرجوع من الحياة الى الخندق ,, نفس التوبيخ  وجلد الذات لما بحاول اسرق الكون ده كله واقفل عيوني عليه .. الكون ده مش ملكي .. انا قطة مذعورة شايفة الحقيقة من زاوية واحدة .. والقلب النونو ده حارس ضعيف مكلبش وحش مجرم .. تعب القلب خلاص من كبت الاحلام وترويضها .. لا الأحلام بتكون وياريتها بتموت ..
ولا الأيام اللي بتنزف ببلاش دي عمرها بتهون .. انا عارفه انه ياقوت وكل يوم جزء منه بيضيع .. واشيل من وشي مكياج الدور ,,,
ثم اخلع حذاء الوهم .
الأرض باردة جدا .. وانا بين الاحتمالات والتوقعات وجنون البشاير يصيبني الجنون .
واخر النهار بعد ما الكلام يخلص وتتوه النوايا في زحمة اليوم .. وتتوه الوعود ,تنمحي الخطط ,تترعش الخطاوي , والحبر يدوب من فوق الورق ويبقى في الكتاب القدير كله يادوب علامة استفهام .. وسهم بيشاور متفهمش لورا ولا لقدام .. او يمكن للسما .. حيث خاتمة التأمل وأسوار الحياة.
وساعات كتير بصارح نفسي بالأشياء .. واوجع نفسي بالمرايات,اعري عيوبي واحط اسمي أول اسم في القوائم السوداء .. ساعات الألم بيفوقني وبيئلمني جداً .. لكن برتاح.
واصعب اللحظات لما احس اني مش فاهماني .. واسب شخصي .و ألعن الأسباب.. واكره البدايات اللي جابتني أنا هنا .. يمكن لو كان هنا حد تاني غيري .. او كنت انا هناك مش هنا .. كانت تنتهي المأساة .. لأن المكان حقيقي مش لايق على الظروف.
وجوة مني مش شبه ملامحي .. ولا وصف يكفي يفسر تشابكي.
وبكتب كل يوم ..يمكن في يوم تخرج بين السطور الكلمة اللي خانقاني .. وتنقشع الغيوم زي السحر بسرعه .. وتنط الشمس من الشبابيك .. واتنهد التنهيدة اللي بتكنس من جوة النفس غبار اليأس .. واضحك .. مش بس من شفايفي .. من كل اعضائي ..
وارقص غصب عني على صوت منير ..
يا أيها السحر الذي تغيب .. المس شباكي بسرعة .. ولوِن الوجود .



الجمعة، 23 ديسمبر 2011

كون سعيـــد



عيش كأنك فيها وليد
لسة الحياة ياما فيها جديد
لسة القمر بيرمي ضوءه عالنجوم وينوره
لسه الولد بيجيب حمام ويطيره
لسه الربيع بيضمنا
لسة الحبايب في الليالي بيسهروا
كل البلابل لسه طايره في السما
والصغير في ايدينا بكرا يكون نما
بس انت شوف وافهم وحس
تلقى الحياة ازهار وبس

وشوش ..



على خدود الحجر ساب الزمن تجاعيد .. تحكي لدنيا البشر قصة ملوك وعبيد

الأربعاء، 21 ديسمبر 2011

بحكيلي عني ..

فرصة سعيدة جداً .. أهلاً .. اتفضلي هنا .. استرخي وقولي كل اللي انتي عايزاه .. اي حاجة تمر على بالك ارميها برا دماغك ..
قولي كل الكلام بترتيب أو بدون ترتيب .. مفهوم أو مبهم .. مترابط أو مفكك ..
أنا ؟؟؟ .. بجد ؟؟؟ .. ممكن أعمل كده ..
فعلاً .. المكان فاضي .. وعلى رأي سعيد صالح .. أنا بكلمني ..
وعموماً في اللحظة دي .. بتمنى اقول ..






 
اخاف من قلبي عندما افرح
اخاف ان ينتصر التفاؤل فيا
و اخاف ان انتظر
فيمل مني الانتظار
اخاف ان اسير في طريق الورد
فيذبل الورد
واموت من جديد
موتة اكبر
اخاف ان اعشق الشمس
فتسارع بالغروب
في قمة عشقي
في قمة احتياجي
للدفء
اخاف ان احب وطني
فيدق الجرس في المطار دقتان
معلنا عن طائرة الرحيل
اني اخاف الحلم الجميل
اكثر من خوفي للكابوس
فالحلم الجميل يسرقني
الى مدن اللون الاخضر
واطفال الخلد الابرار
ثم افيق
حيث لا جنة
لا ملائكة
لا ورد
ولا رحيق
اخاف من جنوني
فذلك الجنون بغير سياج
هارب
مسافر
لايعترف بالحدود
ولا النهايات
لايعرف التوقف
قد خاصم الصبر من زمن
قد كفر بكل الشرائع
في قواميس لغته
لا تجد هذه الكلمات
محظور
حرام
عيب
غير لائق
جنون ايامي
متمرد ... جامح
اما ان يعيش عاريا بين قمم الجبال
وقمم الغيوم
او ان يموت مسجونا
مكبلا
شهيدا نبيلا
لم يتنازل يوما
عن كلمة لا ..
ــــــــــــــ

عبير علي